*اُداسی* شہادتِ امام صادق علیہ السلام *✍ سید غافر رضوی*

*اُداسی*
شہادتِ امام صادق علیہ السلام
*✍ سید غافر رضوی*
25/07/2016

غمگیں بقیع ہے تو مدینہ اداس ہے
جعفر کے غم میں گنبدِ خضرا اداس ہے

کاظم کے سر پہ خاکِ یتیمی پڑی ہوئی
گویا ہیں کائنات کی سانسیں رکی ہوئی
اپنی لحد میں فاطمہ زہرا اداس ہے
جعفر کے غم میں گنبدِ خضرا اداس ہے

لرزی زمیں اٹھی جو صدا شور و شین کی
فریاد پھر سنائی پڑی یاحسین کی
رنج و الم سے عرشِ معلّیٰ اداس ہے
جعفر کے غم میں گنبدِ خضرا اداس ہے

شوّال کے مہینے میں ایسا ستم ہوا
دہلیزِ نورِ علم پہ تالا نظر پڑا
دنیائے علم و فن کا خزانہ اداس ہے
جعفر کے غم میں گنبدِ خضرا اداس ہے

یثرب کی ہر گلی میں بپا شور و شین ہے
جعفر کا حُزن، حُزنِ شہِ مشرقین ہے
گویا کہ کربلا کا جزیرہ اداس ہے
جعفر کے غم میں گنبدِ خضرا اداس ہے

باقر کی روحِ پاک کو کیونکر سکوں ملے
جب دل کے تار تار کی حالت زبوں ملے
بیٹے کے غم میں باپ کی دنیا اداس ہے
جعفر کے غم میں گنبدِ خضرا اداس ہے

*غافر!* بھلا میں کیسے مصائب کروں رقم
قرطاسِ غم کی گود میں رونے لگا قلم
نبّاضِ کائنات کا چہرہ اداس ہے
جعفر کے غم میں گنبدِ خضرا اداس ہے

⚫⚫⚫⚫⚫⚫⚫⚫⚫⚫