زائرانِ اربعین
مولانا سید غافر رضوی فلک چھولسی✍
زائرانِ اربعین
مولانا سید غافر رضوی فلک چھولسی✍
اس لئے گونجا فضاؤں میں بیانِ اربعین
ہر حسینی کے دہن میں ہے زبانِ اربعین
🏴
عرش کی اونچائی بھی نیچی نظر آنے لگی
کس بلندی پر کھڑے ہیں زائرانِ اربعین
🏴
یوں بلالِ دل فصیلِ عشق میں جھوما کیا
مرغِ فطرت نے کہی گویا اذانِ اربعین
🏴
یہ کہاں داعش میں جرآت، بال بھی بانکا کرے
فضلِ حق سے ہیں ملائک پاسبانِ اربعین
🏴
پھونک کر رکّھیں قدم افواجِ داعش سے کہو
جاں ہتھیلی پر لئے ہیں پیروانِ اربعین
🏴
تیرِ سہ شعبہ چلا پائے گا اب نہ حرملہ
ہے ہمارے ہاتھ میں تیر و کمانِ اربعین
🏴
سجدہ و ماتم کی ہمراہی یہ دیتی ہے صدا
کامیابی مل گئی در امتحانِ اربعین
🏴
دیکھ کر حیرت زدہ ہیں عرشِ اعظم کے مکین
کیسا تاروں سے بھرا ہے آسمانِ اربعین
🏴
ہر کس و ناکس نہیں جا پائے گا کرب و بلا
در حقیقت روحِ ایمانی ہے جانِ اربعین
🏴
جنَّتِ اعلیٰ *فلک* بن جائے لمحوں میں، اگر
ہو میسّر خاکِپائے زائرانِ اربعین
🏴🏴🏴🏴🏴🏴🏴🏴🏴🏴
Mashallah
ReplyDelete