شھید باقر النمر کی یاد میں
✍️سید غافر رضوی فلک چھولسی
انقلابی روح تو، تو ہی ہے جانِ انقلاب
لہلیایا خوں سے تیرے گلستانِ انقلاب
مردِ میداں اے مجاہد السّلام اے شیخِ نمر
اے دُر نایاب و زاہد السّلام اے شیخِ نمر
میثم تمار کی مانند حق گوئی کا جوش
برسرِپیکار دشمن کے اڑا دیتا ہے ہوش
کیسے کر پائے گا دشمن خوں کے دریا کو عبور
ہے جنوں کی راہ میں شوقِ شہادت کا وفور
خون سے اپنے وضو راہِ ولایت میں کیا
پھر نمازِ عشق کی محرابِ الفت میں ادا
سالکِ راہِ رضائے خالقِ یکتا سلام
کر رہے ہیں سورما دل سے تمہارا احترام
بوذری لہجہ تعصب کی فضا میں ہے ثبوت
تو شریعت کا محافظ تھا حقیقی تھا سپوت
اے شہیدِ راہِ حق، روح و روانِ انقلاب
دی فصیلِ ظلم سے تونے اذانِ انقلاب
دم بدم اہلِ ستم سے کہتا ہے تیرا لہو
کرچکے ہیں آج ہم آبِ شہادت سے وضو
یاد رکھنا خونِ ناحق رنگ لائے گا ضرور
منھ چھپائیں گے کہاں اہلِ ستم اہلِ غرور
وارثِ خونِ حسینی کو ذرا آنے تو دو
حیدری شمشیر سے پردہ کو اٹھ جانے تو دو
ہر طرف غافر اماں کا بول بالا دیکھنا
انتقامِ خونِ ناحق کا نظارہ دیکھنا
No comments:
Post a Comment